सिरहा-  सीमावर्ती क्षेत्रबाट मरिच र मटर तस्करी हुन थालेको छ। सो क्षेत्रबाट प्रहरीले तस्करहरुलाई धमाधम पक्राउ गर्न थालेपछि मरिच र मटरको तस्करीको तथ्य बाहिर आएको हो। प्रहरीले  सीमावर्ती बरियारपट्टी गाउँपालिका–२ खोक्सीबाट सिरहा प्रहरीले भारत तस्करीका लागि लग्दै गरेको मटरसहित दुईजनालाई पक्राउ गरेको छ। अवैध रुपमा भारततर्फ तस्करी हुन लागेको अबस्थामा तीनबोरा मटरसहित बा ५१ प ९३५८ नम्बरको मोटरसाईकलसहित सोही ठाउँका १८ वर्षिय श्यामजीवन पासवान र रोशन महतोलाई पक्राउ गरिएको हो।

प्रहरीले सिरहाको सीमावर्ती नवराजपुर गाउँपालिका–४ बाट वुधबार चार क्विन्टल मरीचसहित चारवटा मोटरसाईकल नियन्त्रणमा लिएको छ। अवैध रुपमा भारततर्फ तस्करी हुन लागेको मरिचसहित स ६ प २०१३, स १ प ५४०१, स १ प ६५०७, स ५ प ४५२९ नम्बरको मोटरसाईकल नियन्त्रणमा लिइएको हो। प्रहरीको गस्ती टोलीलाई देखेर मोटरसाइकल चालकहरु फारार भएको प्रहरीले जनाएको छ।

नेपालबाट अवैधरुपमा भारततर्फ तस्करी गरिरहेको अवस्थामा उक्त परिमाणको मटरसहितको मोटरसाइलक र मानिसलाई आवश्यक कारबाहीका लागि जिल्ला भन्सार कार्यालय ठाढीमा बुझाईएको सिरहा प्रहरी प्रमुख (एसपी) उमाप्रसाद चतुर्वेदीले जानकारी दिए।

चारवटा मोटरसाईकलसहित समातिएको मरीच पनि आवश्यक कारबाहीका लागि भन्सार कार्यालय ठाढीमा पठाइएको सिरहा प्रहरीले जनाएको छ। पहिला पिकअप जीपमै मटर र मरीच सीमाबाट भारत पुर्याइन्थ्यो बरियारपट्टीका दीपेन्द्र यादवले भने,‘पछिल्लो समय बोर्डरमा गरिएको कडाइका कारण तस्करहरु मोटरसाईकल प्रयोग गर्न थालेका छन्।’ उनले भने,‘मोटरसाईकलमा रसायनीक मल भनेर बोर्डरसम्म लगेर सानोसानो पोका बनाएर पारी पुर्याउने जक्ति रचेका छन्।’ प्रहरीले मोटरसाईकलमाथि पनि निगरानी बढाएर पक्राउ गर्न थालेपछि तस्करहरुमा हलचल पैदा भएको उनले बताए।