साविक विजेता म्यानचेस्टर सिटीले प्रिमियर लिगमा उच्च प्रदर्शनलाई निरन्तरता दिने क्रममा शनिबार सानदार जित निकालेको छ।

घरेलु मैदानमा सिटीले ब्राइटन एन्ड होभ अल्बियोनलाई ४–० को फराकिलो अन्तरले हराउँदै अपराजित यात्रालाई कायमै राखेको छ।

टोलीको जितमा सर्जियो अगुएरोले २ तथा केभिन डि ब्रुएन र बर्नान्डो सिल्भाले समान १-१ गोल गरे । खेल सुरु भएको ७० सेकेन्डमा नै सिटीले गोलको खाता खोलेको थियो । डेभिड सिल्भाको पासमा डि ब्रुएनले गोल गरेका थिए ।

डि ब्रुएनको पासमा इन्जुरी समयको ठिक अगाडि अगुएरोले गोल गरेका थिए । अगुएरोले ५५ औं मिनेटमा अर्को गोल गरे । परिवर्तित बर्नार्डो सिल्भाले ७९ औं मिनेटमा गोल गर्दै टोलीको गोलको अन्तर बढाएका थिए।

४ खेलमा ३ जित र १ बराबरीका साथ १० अंकसहित शीर्षस्थानमा रहेको छ । अल्बियोनको ४ खेलमा ४ अंक छ ।