पतञ्जलि योगपीठका महामन्त्री आचार्य बालकृष्णलाई विषालु पेडा खुवाएर मार्न षडयन्त्र गरिएको आशंका गरिएको छ । 

कृष्णाजन्मष्टमीको दिन एकजना पूर्वकर्मचारीले दिएको पेडा खाएको केही समयमै मुर्च्छा परेपछि उनलाई स्थानीय पातञ्जली अस्पतालमा भर्ना गरेर प्रारम्भिक उपचार गरिएको थियो । उनलाई त्यहाँ चिकित्सकहरूले खानेकुरा विषाक्त भएको हुनसक्ने भन्दै बान्ता गराए र थप उपचारका लागि ऋषिकेशस्थित एम्स अस्पतालमा लैजान सुझाव दिएका थिए । 

एम्स अस्पतालले उनलाई फुड पोइजनिङ भएको बताउँदै केही ढिला भएको भए कोमामा जानसक्ने सम्भावना रहेको जनाएको छ । 

उपचारपछि उनी फर्किएका छन् । तर, उनलाई मार्न नै गम्भीर षडयन्त्र भएको भनेर त्यस कोणबाट अनुसन्धाा सुरू गरिएक बताइएको छ । 

उनले खाएको पेडामा कुनै पनि प्रकारको विषादी हुने भन्दै त्यसको अवशेष फोरेन्सिक जाँचका लागि नयाँदिल्ली पठाइएको बताइएको छ ।

यसैबीच बालकृष्णले जसले यस्तो षडयन्त्र गरेको भए पनि उसलाई माफ गरिदिने बताएका छन् । उनलाई भगवानले यस्तो हर्कत नगर्न सद्वुद्धि दिउन, उनले भनेका छन् । 

नेपाली आमाबाबुका भारतीय सन्तान बालकृष्ण विश्वकै ३६५औँ धनी व्यक्ति हुन् । पतञ्जलि योगपीठको ९८.६ प्रतिशत सेयर रहेका उनको कुल सम्पत्ति ४.८ अर्ब डलर आकलन गरिएको छ।