रुपन्देही क्रिकेट संघको आयोजनामा भैरहवामा जिल्लास्तरीय अन्तर विद्यालय टि–२० क्रिकेट प्रतियोगिता हुने भएको छ।
सिद्धार्थ क्रिकेट मैदानामा मंसिर १८ देखि २४ गतेसम्म स्व.शेरबहादुर सेन्चुरी मेमोरियल अन्तरविद्यालय स्तरीय टी–२० क्रिकेट प्रतियोगिता हुने भएको हो।
विद्यार्थी क्रिकेट खेलाडीहरुमा भएको क्षमताको विकास गर्न र विद्यालयस्तरबाटै खेलाडी उत्पादनमा सहयोग पुर्याउने उद्देश्यले जिल्लाका १३ विद्यालयको सहभागितामा प्रतियोगिता आयोजना गर्न लागिएको आयोजकले शनिबार भैरहवामा पत्रकार सम्मेलन गरी जानकारी दिएका छन्।
कक्षा कोठाको सिकाइमात्रै नभई विद्यार्थीको अतिरिक्त क्रियाकलापमा पनि विकास गर्न जरुरी हुन्छ। विद्यार्थी प्रति बढेको क्रिकेटको मोहलाई ध्यानमा राखेर नै संघले संचालन गर्दै आएको यो प्रतियोगिता कोभिड महामारीले रोकिए पनि अहिले निरन्तरता दिइएको अध्यक्ष हरिबहादुर थापाले बताए।
मुख्य प्रायोजक बिके ज्वेलर्स रहेको प्रतियोगिताको विजेता टिमले नगद ३० हजार, उपबिजेता टिमले नगद १५ हजार रुपैयाँ र ट्रफी प्रदान गरिने खेल संयोजक उदयकुमार मल्लिकले जानकारी दिए।
यस्तै म्यान अफ द सिरिजलाई ५ हजार, उत्कृष्ट बलर र ब्याट्सम्यानलाई दुई हजार ५ सय, प्रत्येक खेलको म्यान अफ द म्याचलाई ५ सय रुपैयाँ प्रदान गरिने छ। प्रतियोगिताको अन्तिममा अनुशासित खेल प्रदर्शन गर्ने एक टिमलाई पनि पुरस्कृत गरिने आयोजकले जानकारी दिएका छन्।
प्रतियोगितामा साई ग्लोबल स्कूल एभरेष्ट इङ्गलिस बोर्डिङ स्कूल, होराइजन, बुद्धज्योति, नवज्योति, काशी नोबल, लुम्बिनी शिक्षा निकेतन, न्यू होराइजन, जेसिस, शनसाइन, शान्ति नमूना, देबदह बुद्ध, ग्रिनप्लान्ट गरी १३ विद्यालय सहभागी हुनेछन्।
