नेपाली काँग्रेसका वरिष्ठ नेता रामचन्द्र पौडेल पक्षले भदौ १६–१९ का लागि निर्धारित महाधिवेशन सार्ने विषयमा साथ नदिने भएको छ । पार्टीका पूर्वमहामन्त्री प्रकाशमान सिंहको निवास चाक्सीबारीमा विहीबार बसेको पौडेल पक्षीय शीर्ष नेताको बैठकले संवैधानिक प्रश्न उठ्ने गरी महाधिवेशन सारिए अस्वीकार गर्ने निष्कर्ष निकालेको छ ।
नेपाली काँग्रेसले २०७२ फागुन २३ गते १३ औं महाधिवेशन सम्पन्न गरेको भदौ २३ गते ५ वर्ष ६ महिना पुरा हुँदै छ । नेपालको संविधानको धारा २७९ उपधारा ४ अनुसार महाधिवेशन भएको ५ वर्ष ६ महिनाभित्र केन्द्रीय र प्रादेशिक कार्यसमितिको निर्वाचन गरिसक्नुपर्ने व्यवस्था गरेको छ ।
सोहीअनुसार भदौ २३ गतेपछि नयाँ कार्यसमिति आएन भने काँग्रेसको वर्तमान कार्य समितिको वैधानिकता सकिन्छ । त्यसपछि महाधिवेशनको मिति सार्ने कुरा आफूहरुलाई स्वीकार्य नहुने निष्कर्ष निकालिएको पौडेल पक्षीय नेता अर्जुननरसिंह केसीले रातोपाटीलाई बताए ।
गगन थापाले पनि भदौ २३ गतेपछि यो केन्द्रीय कार्यसमितिको वैधानिकतामाथि संवैधानिक, कानुनी, नैतिक र राजनीतिक प्रश्न आउने बताए । उनले भने, ‘त्यसपछि वर्तमान कार्यसमितिलाई मानिँदैन । यो नमानिने कुरा वडा तहसम्म जान्छ ।’
भदौ २३ गतेपछि पार्टीको वैधानिक अस्तित्वमाथि गम्भीर संकट पैदा हुने भएकाले विकल्प सोच्नुपर्ने बेला आएको केसीले बताए । विकल्पका रुपमा तीन महिनाअघि केन्द्रीय कार्यसमिति बैठकमा आफूले विशेष महाधिवेशनको लिखित प्रस्ताव राखेको केसीले स्मरण गराए ।
