सिराहामा बोक्सी आरोपमा कुटपिट गरि हत्या गरेको आरोपमा छोरा पक्राउ परेका छन्।

कर्जन्हा नगरपालिका वडा नम्बर ३ खैराटोलका ४७ वर्षीय राम अवतार साहले ८५ वर्षीया आमा सुदामा देवी साहलाई कुटपिट गरि गम्भीर घाइते बनाएका थिए। 

शनिबार दिउँसो स्वास्थ्यमा गम्भीर समस्या देखिएपछि उनलाई सिरहा अस्पताल भर्ना गरिएको थियो। 

उनकाे शनिबार साँझ ५ बजे उपचारको क्रममा सिरहा अस्पतालमा मृत्यु भएको इलाका प्रहरी कार्यालय मिर्चैयाका डीएसपी सन्तुलाल जयसवालले जानकारी दिए।

जयसवालका अनुसार गएको बुधबार छोराकी पत्नी बुहारी मनीषाको खुट्टामा घाउ भएपछि रामऔतारले आमामाथि बोक्सीको आरोप लगाउँदै मलमूत्र खुवाउने प्रयास गरेका थिए।

यसका साथै उनको कान्छो छोरा रामऔतारले गाउँलेकै अगाडी निर्घात कुटपिट समेत गरेका थिए।

गाउँलेले खबर गरेपछि समयमै प्रहरी पुग्दा दिसा खुउने प्रयास असफल भएपनि कुटपिटबाट सुदामादेवी गम्भीर घाइते भएकी थिइन्।

घाइते भएकी सुदामाको सिरहामा सामान्य उपचार पश्चात जनकपुरधामस्थित राम जानकी मेडिकलमा ल्याएको थियाे। दुईदिनको उपचार पश्चात घर फर्काइएको थियो।

तर निको हुनुको सट्टा अवस्था थप खराब भई मृत्यु भएको डीएसपी जयसवालकाे जानकारी दिए।

घटना लगतै फरार भएका राऔतारलाई दुईदिनपछि गएको शुक्रबार दिउँसो ३ बजे प्रहरीले पक्राउ गरेको थियो।

प्रहरीका अनुसार पक्राउ परेका छोरा रामऔतारले अपराध स्वीकार गरिसकेका छन्।