काठमाडौं महानगरपालिका १६ माछापोखरीबाट हातहतियारसहित एक जना पक्राउ परेका छन्। 

'मेड इन युएस' लेखेको २ थान पेस्तोल, २ थान म्यागजिन र पेस्तोलमा प्रयोग हुने १० राउन्ड गोलीसहित नुवाकोट शिखरबेसी ६ बस्ने २७ वर्षीय विकेश पण्डित पक्राउ गरिएकाे काठमाडौं अपराध महाशाखाका प्रहरी उपरीक्षक होविन्द्र बोगटीले जानकारी दिए।

पण्डितसँगकाे प्रारम्भिक सोधपुछका क्रममा पेस्ताेल ओसारपोसार गराउन लगाउने नुवाकोट लिपु गाउँपालिका १ का २८ वर्षीय अमर तामाङलाई पनि प्रहरीले पक्राउ गरिएको छ।

 प्रहरी निरीक्षक भोलाकुमार भट्टको कमाण्डमा खटिएको टोलीले जिल्ला प्रहरी कार्यालय नुवाकोटसँगको समन्वयमा तामाङलाई नुवाकोटस्थित घरबाटै पक्राउ गरी काठमाडौं टेकुस्थित अपराध महाशाखा ल्याएर अनुसन्धान थालेको छ।

 तामाङ डाँका मुद्दामा ६ वर्ष २ महिना कैद भुक्तान गरेर गत फागुनमा छुटेका व्यक्ति भएकाे प्रहरीले बताएकाे छ।

उनीहरूलाई आवश्यक कारबाहीका लागि महानगरीय प्रहरी परिसर टेकु पठाइएको छ।