जिल्लाको पूर्वी उत्तरी भेगको स्वामीकार्तिक गाउँपालिका–१ साप्पाटाकी गर्भवतीको आज नेपाली सेनाको हेलिकप्टरमार्फत उद्धार गरिएको छ। 
    
प्रमुख जिल्ला अधिकारी कृष्ण गैह्रेका अनुसार साप्पाटाकी २३ वर्षीया शर्मिला बुढाको सेनाको हेलिकप्टरमा नेपालगञ्ज पठाइएको हो। 

महिलाको पेटमा शिशु मरेकाले कोल्टीमा उपचार सम्भव नभएपछि नेपालगञ्ज रिफर गरिएको कोल्टी प्राथमिक स्वास्थ्य केन्द्रका प्रमुख डाक्टर राजुराज जैशीले जानकारी दिए। गर्भवती बुढाको अवस्था जटिल हुने अवस्था पुगेपछि हेलिकप्टरमार्फत उद्धार गरिएको प्रमुख कृष्णको भनाइ छ। 
    
    वडाध्यक्षको मृत्यु 

बाजुराको बूढीगङ्गा नगरपालिका–१ का वडाध्यक्षको आज मृत्यु भएको छ। मृत्यु हुनेमा सोही नगरपालिका–१ का वडाध्यक्ष ६८ वर्षीया राजेशकुमार सिंह रहेको वडासदस्य ललित थापाले जानकारी दिए। 
    
घरको पूजा गर्ने तयारीमा नुहाएर आएर एक्कासि बेहोस भएपछि उनको मृत्यु भएको स्थानीय आफन्तसमेत रहेका भरतराज उपाध्यायको भनाइ छ। मृतक सिंह नेपाली काँग्रेसबाट निर्वाचित वडाअध्यक्ष थिए।