ललितपुर बखुण्डोलमा सैलुन सञ्चालन गर्ने रविन ठाकुर कोरोना भाइरस प्रति सचेत छन् । केही दिन पहिले उनको सैलुनमा कपाल काट्न चिनियाँ नागरिक आएका थिए । सँगै एकजना नेपाली पनि आएकाले उनीहरुलाई केही भएको त छैन भनेर उनले सोधे । चीनबाट कोरोना भाइरस सुरु हुनुभन्दा पहिले नै नेपाल आएको बताएपछि उनले मास्क लगाएर कपाल काटे ।
यो भाइरसका बारेमा आएका समाचारमा पनि उनी चनाखो हुने गरेका छन् । पत्रिकामा त्रिभुवन विमानस्थलमा उच्च सुरक्षा सतर्कता नअपनाइएको समाचार आएपछि आफूलाई डर लागेको उनले सुनाए । दैनिक धेरै मानिसहरुको संसर्गमा रहनुपर्ने भएकाले अचेल मास्क लगाएर मात्र कपाल काट्ने गरेको उनले सुनाए ।
