हिन्दु धर्मावलम्बी नेपालीहरूको दोस्रो ठूलो चाड तिहार भोलि (कात्तिक ९ बाट) शुरु हुँदैछ । बजारमा तिहारका लागि सामान किन्नेहरुको भीड उत्तिकै बढेको छ । विशेषगरी भाइटीकामा प्रयोग हुने मसलाको माग यतिबेला बढी हुन्छ । माग बढेकै कारण व्यवसायीहरूले महँगो मूल्यमा तिहारको मसला बेचिरहेका छन् । पसल नै पिच्छे आ–आफ्नै खालका मूल्य निर्धारण भएको पाइन्छ ।
एउटै मसलामा गत वर्षको तुलनामा प्रतिकेजी २ हजार ५ सय रुपैयाँसम्मले बढेको छ । यद्यपि, एक÷दुई आइटम बाहेक अन्य मसलामा खासै मूल्य नबढेको खुद्रा ब्यापार संघका अध्यक्ष राजकुमार श्रेष्ठले बताए ।
