करिब पन्ध्र करोड वर्ष अगाडि जब यो धर्तीमा डायनासोर नामको भिमकाय जनावरको राज चल्थ्यो, त्यो युगलाई हामी 'जुरासिक पिरियड' भन्छौं।
त्यही कालखण्डको अन्तिम–अन्तिमतिर एउटा ठूलो डायनासोर दलदले जमिनमा हिँडिरहेको थियो। यो डायनासोरको घाँटी लामो थियो, पुच्छर पनि लामै। हात्ती जत्रै डायनासोर 'साउरोपड' प्रजातिको थियो जसको विशेषता माउसुलीका जस्ता अलिकति छरिएका खुट्टा हुन्थे। आकार भने झन्डै १६ इन्च जति फैलिएको।
त्यो डायनासोर हिँडिरहेका बेला त्यसको खुट्टामुनि कुनै दह्रो चिज पर्यो। जति नै दह्रो भए पनि डायनासोरका खाँबाजस्ता खुट्टा र वजनले त्यसलाई करक्क पार्छ नै। डायनासोरले त्यो आवाज सुन्यो–सुनेन थाहा छैन। उसको पैतालाभन्दा सानो त्यो चिज पानीमा बस्ने ठूलो कछुवा थियो।
