असार १३, २०७६
काठमाडौं : प्रधानमन्त्री रोजगार कार्यक्रमअन्तर्गत काठमाडौं महानगरपालिकामा ८२ जनाले काम गरिरहेका छन्। यस अभियानअन्तर्गत महानगरले बाटो, पोखरी सफा गर्ने र वृक्षरोपण गर्ने सडक तथा उद्दानमा झार उखेलेर सफाइ गर्ने कार्यक्रम गरिरहेको छ। महानगरको सरसफाइका क्रममा हालसम्म २० लाख रुपैयाँ बजेट खर्च भइसकेको प्रधानमन्त्री रोजगार संयोजक शाखा अधिकृत भरतकुमार वलीले बताए।
देशको सबैभन्दा ठूलो र पुरानो काठमाडौं महानगरपालिकामा प्रधानमन्त्री रोजगार कार्यक्रममा महिलाको उपस्थित धेरै भएको महानगरको विवरणले जनाएको छ। बेरोजगारलाई रोजगारी दिने उद्देश्यले प्रधानमन्त्री रोजगार कार्यक्रम सुरु गरेको पाँच महिना भइसकेको छ। एक घर एक रोजगार भन्ने अभियानसहित प्रधानमन्त्री रोजगारको कार्यक्रम भव्यताको साथ उदघाटन गरिएको थियो।
