काठमाडौं: नेपालमा लामखुट्टेको टोकाइबाट सर्ने डेंगु नामक रोग महामारीको रुपमा फैलिरहेको छ। प्रि-मनसुन (समयभन्दा अघि नै आएको वर्षा) का नेपालमा डेंगु तीब्र रुपमा फैलिएको विज्ञहरु बताउँछन्। अहिलेसम्म देशभर तीन जनाको डेंगुका कारण मृत्यु भएको छ भने एक हजार पाँच सय ३७ बिरामी छन्।

यसअघि कहिल्यै डेंगु नदेखिएका केही जिल्लाहरुमा पनि यो वर्ष महामारी फैलिएको इपिडिमियोलोजी तथा रोग नियन्त्रण महाशाखाका टेकुका भेक्टर कन्ट्रोल निरीक्षक उत्तमराज प्याकुरेलले जानकारी दिए।

प्याकुरेलले भने, 'यसले केही जिल्लाहरुमा महामारीको रुप लिएकै हो। यसअघि डेंगु नदेखिएका केही जिल्लाहरुमा पनि डेंगुका बिरामीहरु बढिरहेकाले यसलाई ती जिल्लाहरुमा महामारी भन्न सकिन्छ। हाल प्रदेश नम्बर १, ३ र ४ मा डेंगु रोग महामारीको रुपमा फैलिएको छ। यसअघि नै डेंगु रोग देखिएका जिल्लाहरुमा यो रोग केही मात्रामा बढ्दा भने महामारी भन्न मिल्दैन।'