स्पेनिस ला लिगा फुटबलमा उपाधि दाबेदार रियल मड्रिड बराबरीमा रोकिएको छ। शनिबार राति घरेलु मैदानमा भएको खेलमा रियल मड्रिड रियल भालाडोलिडसँग १-१ गोलको बराबरीमा रोकिएको हो।

सुरुवाती अग्रता जोगाउन नसक्दा रियलले भालाडोलिडसँग बराबरी खेल्दै अंक बाडेको हो। रियलका लागि करिम बेन्जिमाले गोल गर्दा भालाडोलिडका सेर्गी ग्वार्डीवलाले गोल गरेका थिए।

पहिलो हाफ गोलरहित बराबरी भएको खेलको ८२ औं मिनेटमा बेन्जिमाको गोलबाट रियलले सुरुवाती अग्रता बनाएको थियो। तर, खेलको ८८ औं मिनेटमा ग्वार्डीवलाले गोल गर्दै भालाडोलिडलाई १-१ गोलको बराबरीमा ल्याए।

त्यसपछि दुवै टोलीले थप गोल गर्न सकेनन् र खेल बराबरीमा सकियो ।

बराबरीसँगै रियलले २ खेलबाट ४ अंक जोडेको छ। भालाडोलिडले पनि २ खेलबाट ४ अंक जोडेको छ। रियल दोस्रो र भालाडोलिड तेस्रो स्थानमा छन्। २ खेलमा सतप्रतिशत जित निकालेको शेभिल्ला शीर्ष स्थानमा छ।