क्यानडामा जारी ग्लोबल टी-२० लिगमा क्रिस गेलले आक्रमक इनिङ खेल्दा भ्यानकाेभर नाइट्सले सहज जित निकालेको छ।

प्रतियोगिता अन्तर्गत गए रातिको खेलमा एडमन्टन रोयल्सलाई ६ विकेटले हराउँदै भ्यानकाेभर दोस्रो स्थानमा उक्लिएको हो।

एडमन्टनले दिएको १ सय ६६ रनको लक्ष्य पछ्याएको भ्यानकाेभरले १६.३ ओभरमा मात्र ४ विकेट गुमाउँदै लक्ष्य पुरा गरेको थियो ।

भ्यानकाेभरका लागि कप्तान क्रिश गेलले ४४ बलमा ९४ रन बनाए। ९ छक्का र ६ चौका प्रहार गरेका गेलले एकै ओभरमा ४ छक्कासहित ३२ रनसमेत बनाएका थिए।

गेलले यसअघि १ सय २२ रनको शतकीय इनिङ खेलिसकेका छन्।

त्यस्तै शोयब मलिकले १७ बलमा ३४ रन बनाए भने चडविक वाल्टनले १७ तथा डानियल साम्सले १६ रन बनाएका थिए।

एडमन्टनका बेन कटिङले ३ विकेट लिए भने मोहमद हाफिजले एक विकेट लिएका थिए।

टस हारेर पहिला ब्याटिङ गरेको एडमन्टनले २० ओभरमा ९ विकेट गुमाउँदै १ सय ६५ रन बनाएको थियो।

एडमन्टनका लागि बेन कटिङले सर्वाधिक ७२ रन बनाएका थिए । ४१ बल खेलेका कटिङले ७ छक्का र ३ चौका प्रहार गरेका थिए।

त्यस्तै मोहम्मद नवाजले २७ बलमा ४० रन बनाउँदा जिम्मी निशामले २८ रन बनाएका थिए।

भ्यानकाेभरका बलर अली खान, साद बिन जाफर र हेडेन वाल्सले समान २-२ विकेट लिएका थिए । त्यस्तै शोयब मलिकले एक विकेट लिएका थिए।

जितपछि भ्यानकाेभर ४ खेलमा २ जित र एक खेलमा अंक बाड्दै ५ अंकसहित दोस्रो स्थानमा छ। एडमन्टन रोयल्सले अहिलेसम्म खेलेका चार वटै खेलमा हार बेहोरेको छ।

ग्लोबल टी-२० लिग अन्तर्गत शनिबार सन्दीप लामिछानेको टिम टोरन्टो नेशनल्स र ब्रम्पटन वोल्भ्सबीच खेल हुँदैछ।