काठमाडौ : सोमवार बिहानै समाचार आयो, ‘महानगरीय प्रहरी प्रभाग भैँसेपाटीको हिरासत कक्षबाट चार जना कैदी फरार।‘ प्रहरी प्रभागका थुनुवाहरुलाई हिरासत कक्ष सुरक्षाका हिसाबले सामान्य किसिमका हुन्छन्। शौचालयको अवस्था पनि उस्तै नाजुक हुन्छन्। भएपनि थुनुवाहरु सजिलै भाग्न सक्ने अवस्था हुँदैन।

भैंसेपाटी प्रभागबाट थुनुवाहरु शौचालयको झ्यालको ग्रील काटेर भागेको देखियो। झ्यालको ग्रील काट्नको लागि कम्तीमा पनि ह्याक्सो ब्लेडको आवश्यकता पर्छ। त्यसमाथि ग्रील काट्दा आवाज पनि उत्तिकै आउँछ। तर भैंसेपाटीको प्रभागभित्रको झ्यालको ग्रील काट्दा कुनै पनि प्रहरीले थाहा पाउँदैनन्।

अंग्रेजीमा एउटा प्रख्यात टेलिभिजन सिरिज छ, प्रिजन ब्रेक। यो सिरिजको प्रमुख पात्र जस्तासुकै सुरक्षित जेलबाट पनि भाग्न सफल देखाइएको छ। उसो त नेपालको केन्द्रीय कारागार, सुन्धारामा रहेका कैदी चार्ल्स शोभराज पनि जेलबाट भाग्न सिपालु मानिन्छन्। ‘उमेरले साथ दिएन नत्र शोभराजलाई हाम्रो जेलले के छेक्थ्यो’ भन्ने कथन नै छ नेपाल प्रहरीभित्र। तर भैंसेपाटी प्रभागबाट भागेका थुनुवा भने न त प्रिजन ब्रेकका ‘हिरो’ हुन्, न त शोभराजजस्ता खुंखार नै।

फरार भएका तीन जना थुनुवा मध्ये दुई जना पक्राउ परिसकेका छन्। महानगरीय अपराध महाशाखाको टोलीले बुधवार साँझ बौद्ध जम्बुडाँडाबाट उनीहरूलाई पक्राउ गरेको हो। महाशाखाको टोलीले रुद्रलाल श्रेष्ठ र शम्शेर साझालाई नियन्त्रणमा लिएको महाशाखाका एसएसी सहकुल थापाले जानकारी दिए। फरार एक जनाको भने खोजी भइरहेको छ। प्रहरीले पक्राउ गरेर अनुसन्धान थालेपछि देखियो, यिनीहरुले प्रिजन ब्रेककै हिरोको शैली पच्छ्याएका रहेछन्।