‘मातृभूमि जागरण अभियान’का प्रस्तावक, पूर्वउपप्रधानमन्त्री तथा गृह–रक्षामन्त्री डा. भीम रावलले प्रधानमन्त्री केपी शर्मा ओली नेतृत्वको ‘कांग्रेस–एमाले’ सरकार जनताको हितमा नभई नाफाखोर र विचौलियाहरूको इसारामा चलिरहेको आरोप लगाएका छन्।

सरकारले केही दिनअघि अध्यादेशमार्फत् व्यावसायिक वातावरण सुधार गर्न भन्दै ‘कालोबजारी ऐन–२०३२’ मा राखिएको मुनाफा र कारबाहीको व्यवस्था हटाएपछि नेता रावलले बुधबार एकाबिहानै सामाजिक सञ्जालमार्फत् प्रधानमन्त्री ओलीविरूद्ध ‘फायर’ खोलेका हुन्।

विचौलियालाई फाइदा हुने गरी ओली नेतृत्वको सरकारले २० प्रतिशतभन्दा बढी नाफा लिन नपाइने कानूनी व्यवस्था अध्यादेशमार्फत् खारेज गर्दै सिमेन्टको मूल्य दोब्बर बनाएपछि उनले जनआक्रोश पोखे।

‘केपी नेतृत्वको सरकार जनताको पक्षमा नभई नाफाखोर र विचौलियाको इसारामा चल्छ भन्ने तथ्य वस्तुमा २० प्रतशत बढी नाफा लिन नपाइने कानून अध्यादेशद्वारा हटाएर सिमेण्टको मूल्य दोब्बर बढाइएबाट फेरी पुष्टि भएको छ,’ उनले सञ्जालमा लेखेका छन्।