दार्चुलामा एमालेको विजय जुलुसका लागि मान्छे लिन गएको हाइस दुर्घटना हुँदा तीन जनाको मृत्यु भएको हो।
बिहान साढे ९ बजे महाकाली राजमार्गमा पर्ने शैल्यशिखर नगरपालिका-६ को ग्वानी भन्ने ठाउँमा से१ज २७७ नम्बरको हाइस दुर्घटना हुँदा तीनजनाको घटनास्थलमै मृत्यु भएको हो।
एमालेको विजय जुलुसमा सहभागी गराउन गोकुलेश्वरतर्फ मान्छे लिन जाने क्रममा दुर्घटनामा परेको जिल्ला प्रहरी कार्यालय दार्चुलाका प्रहरी निरीक्षक हिक्मत थापाले जानकारी दिए।
मृत्यु हुनेमा चालकसमेत रहेका शैल्यशिखर नगरपालिका-६ का प्रकाश धामी, सहचालक नवीन सिंह धामीको परिचय खुलेको र अर्का एक मृतकको परिचय खुल्न नसकेको उनले बताए।
‘जुलुसमा सहभागी गराउन मान्छे ओसार्न गइरहेको भन्ने बुझिएको छ,’ थापाले भने, ‘कुन पार्टी हो खुलेको छैन, हाइसमा सवार तीनजना मात्रै थिए,’ उनले भने। हाइस सडकबाट करिब पाँच सय मिटर तल खसेको छ। प्रहरी टोली घटनास्थलमा रहेको प्रहरी निरीक्षक थापाले बताए।
