काठमाडौं महानगरमा नेकपा (एमाले)बाट उपमेयरकी उम्मेदवार सुनिता डंगोलविरूद्ध अख्तियार दुरूपयोग अनुसन्धान आयोगमा शैक्षिक प्रमाणपत्र ढाँटेर विज्ञ सल्लाहकारको नियुक्ति लिएको भन्दै उजूरी दर्ता भएको छ।

उजूरीमा उम्मेदवार डंगोलले स्नातकोत्तर योग्यता प्राप्त गरेको भनी ढाँटी पाँचवर्ष काठमाडौं महानगरको शहरी विकास परियोजनाको सल्लाहकार नियुक्ति लिई तलब सुविधा लिएको आरोप छ।

काठमाडौं महानगरमा रहेको शहरी विकास परियोजना जस्तो प्राविधिक विषयको ज्ञाता हुनुपर्ने र स्नातकोत्तर अध्ययन गरेको हुनुपर्नेमा समाजशास्त्र विषयमा स्नातक गरेको व्यक्तिलाई नियुक्ति दिइएको भन्दै गैरकानूनी आर्थिक लाभ लिएको आरोप छ। उजूरी १६ वैशाखमा दर्ता गरिएको छ।

उजूरीमा डंगोलको नियुक्तिको सम्पूर्ण फाइल काठमाडौं महानगरबाट झिकाई भ्रष्टाचार निवारण ऐन अनुसार कसूर सजाय गराई प्राप्त गरेको रकम तथा जरिवाना समेत असुल उपर गराउन माग गरिएको छ। अख्तियारमा उक्त उजूरीको दर्ता नम्बर सी-०३२५३१, ०७९-०१-१६, १५२६२३८५ छ।