लोकतन्त्रलाई र संस्थागत बनाउनका लागि न्यायपालिकाको महत्वपूर्ण भूमिका हुन्छ । अहिले न्यायालय एउटा अस्तित्वको लडाइँ लड्दैछ । न्यायालय गम्भीर संकटमा परेको छ । अस्तित्वकै संकटमा परेको छ । यसका पछाडि धेरै फ्याक्टरहरु छन् । के भनिँदैछ भने प्रधानन्यायाधीश चोलेन्द्र शमशेर जबराका कारणले मात्रै अदालत संकटमा परेको हो त ? पात्र जिम्मेवार छ कि प्रवृत्ति जिम्मेवार छ ?
अहिले दुईवटै जिम्मेवार छन् । एउटा खराब पात्रको लामो समयको व्यवहारको प्याट्रनले एउटा खास किसिमको प्रवृत्ति निश्चित गर्छ । प्रवृत्ति भन्ने कुरा आकाशबाट खस्ने चिज होइन । एउटा कुनै पात्रले निरन्तररुपमा राम्रो काम गर्यो भने राम्रो प्रवृत्ति विकसित हुन्छ ।
प्रधानन्यायाधीश भनेको न्यायालयको लिडर हो । उसले चाह्यो भने सुधारको प्रक्रियालाई अगाडि बढाउन सक्छ । या, त्यसलाई अवरुद्ध गर्न सक्छ । अहिले के देखिएको छ भने प्रधानन्यायाधीश आफैं समस्या बन्नुभयो । उहाँ समाधानको होइन, समस्याको पार्ट बन्नुभयो । नेपालमा अनौठो के देखियो भने न्यायालयको स्वतन्त्रता, क्षमता, निष्पक्षता र सुशासनमा अहिले सबैभन्दा ठूलो थ्रेट प्रधानन्यायधीशबाटै भयो । प्रधानन्यायाधीशकै गैरन्यायिक क्रियाकलाप र गैरन्यायिक आचरणले गर्दाखेरि अहिले न्यायपालिका सबैभन्दा ठूलो खतरामा पर्यो ।
