विवेकशील नेपालीका पूर्वअध्यक्ष तथा विवेकशील पार्टीका नेता उज्ज्वल थापाको कोरोना संक्रमणबाट निधन भएको छ। उपचारको क्रममा मंगलबार अपराहृन ४ बजेर २५ मिनेटमा ललितपुरको भैँसेपाटीस्थित मेडिसिटी अस्पतालमा उनको निधन भएको हो।

भेन्टिलेटर र इक्मो विधिबाट उपचाररत थापाको आइतबारदेखि स्वास्थ्य अवस्था जटिल बन्दै गएको थियो। कोरोना भाइरसको संक्रमण देखिएपछि थापालाई ह्याम्स अस्पताल भर्ना गरिएको थियो।

त्यसपछि ग्राण्डी अस्पताल हुँदै उनलाई मेडिसिटीमा लगिए पनि अन्ततः कोरोना भाइरससँग उनी पराजित भएका हुन्। कोरोना रिपोर्ट नेगेटिभ आए पनि भाइरसले दीर्घकालीन क्षति गरिसकेको हुँदा थापालाई बचाउन नसकिएको उपचारमा संलग्न चिकित्सकहरूले बताएका छन्।