शेयर बजारले पुस महिनाको अन्तिम दिन नेप्से सूचकले १८.८१ अंकले बढेर २२८६.५५ विन्दुको नयाँ रेकर्ड बनाएको छ। यस दिन झण्डै ६ अर्ब रुपैयाँ बराबरको शेयर कारोबार भएको छ।
२०७ वटा कम्पनीको १ करोड ३२ लाख ८९ हजार ८४९ कित्ता शेयर ५ अर्ब ९१ करोड ४३ लाख रुपैयाँमा खरिद बिक्री भएको हो। चालु आर्थिक वर्षको दोस्रो त्रैमास पनि विदा हुँदैछ । मसान्तको दिन पनि बजार आकर्षक हिसाबले वृद्धि भएको छ ।
नेप्से सूचक र खरिदबिक्री रकममा पनि सकारात्मक माहोल देखिएको छ । अधिकांश सूचक सकारात्मक रहँदा विशेषगरी फाइनान्स, उत्पादनमूलक, माइक्रोफाइनान्स र बीमा समूहहरुमा अधिक तेजी देखिएको छ ।
पछिल्लो केही दिनयता बैंकिङ समूहको सूचक उकालो लाग्दै आएकोमा बुधबार भने फाइनान्स र उत्पादनमूलक उपसमूहको सूचक उच्च दरले बढेको छ।
लगानीकर्ताले बैंकिङ छोडेर उत्पादनमूलक र फाइनान्स कम्पनीहरुको शेयर खरीद बढाएको देखिन्छ। यस्तै, माइक्रोफाइनान्स उपसमूहमा पनि लगानीकर्ताको आकर्षण बढेको छ। यस दिन बैंकिङ उपसमूहको सूचक भने ०.१८ प्रतिशतले घटेको छ।
पछिल्ला दिनहरुमा सेयर बजारमा चमक आइरहेको छ । माघदेखि ब्याजदर थप घट्ने भएको छ । सोही अनुसार बैंकहरुको आधार दर घट्दै गएको देखिएको छ । बैंकहरुले ब्याजदर घटेको सूचना पनि धमाधम सार्वजनिक गरिसकेका छन् । यसबाट आगामी दिनमा बजार अझै सकारात्मक बन्ने अनुमान गरिएको छ ।
बजार बुलिस चक्रमा हिँडिरहेको छ । यो चक्रमा बजारको वृद्धिक्रम बढी हुने गर्छ । घटबढ हुँदै बजार अघि बढ्ने भए पनि प्रतिशतमा हेर्दा वृद्धिक्रम अधिक हुने गर्छ । बुल रनको विशेषता यही हो । बुल रनलाई न्यून विन्दुको ब्याजदरले सहयोग गरेको छ ।
बुधबार कारोबारमा आएकामध्ये १२ वटा कम्पनीको शेयर सकारात्मक सर्किट लेभलमा कारोबार भएको छ। यस दिन कर्पोरेट डेभलपमेन्ट बैंकको शेयरमूल्य सबैभन्दा धेरै १० प्रतिशतले बढेको छ भने आरम्भ चौतारी, फर्स्ट माइक्रोफाइनान्स, इन्फिनिटि लघुवित्त, नारायणी डेभलपमेन्ट बैंक लगायताको १२ वटा कम्पनीको शेयरमूल्य ९ प्रतिशतभन्दा धेरैले बढेको छ।
उता मल्टिपर्पस फाइनान्सको शेयरमूल्य सबैभन्दा धेरै ४.७१ प्रतिशतले घटेको छ भने महिला सहयात्रा माइक्रोफाइनान्सको ३.८२ प्रतिशत, नेपाल एसबिआई बैंकको ३.७२ प्रतिशत, सिभिल बैंकको १.७९ प्रतिशत र नेपाल इन्स्योरेन्सको १.४६ प्रतिशतले घटेको छ।
नेपाल दुरसञ्चार कम्पनीको सबैभन्दा धेरै २६ करोड ५५ लाख रुपैयाँ बराबरको शेयर कारोबार भएको छ भने नेपाल पुनर्बीमा कम्पनीको २० करोड ७२ लाख, अपर तामाकोशीको १८ करोड ४९ लाख, शिवम् सिमेन्टको १६ करोड ३६ लाख र एनआइसी एशिया बैंकको १५ करोड ९३ लाख रुपैयाँ बराबरको शेयर कारोबार भएको छ।
यस दिन कारोबारमा आएकामध्ये १२९ वटा कम्पनीको शेयरमूल्य बढेको छ भने ३८ वटाको शेयरमूल्य घटेको छ। ८ वटा कम्पनीको शेयरमूल्यमा भने कुनै परिवर्तन भएन।
