राष्ट्रपति विद्यादेवी भण्डारीले चिनियाँ नयाँ वर्षको अवसरमा शुभकामना सन्देश पठाएकी छन्।

चिनियाँ राष्ट्रपति सी चिनफिङ र चिनियाँ नागरिकलाई सम्बोधन गर्दै राष्ट्रपति भण्डारीले भिडियो सन्देश बिहीबार नेपालस्थित चिनियाँ दूतावासमार्फत पठाएकी हुन्। 

राष्ट्रपतिले भिडियो मार्फत शुभकामना सन्देश पठाएको यो पहिलो हो। नयाँ प्रविधिको प्रयोग गर्दै ५ मिनेट ३० सेकेन्डको भिडियो सन्देश पठाएको राष्ट्रपति कार्यालय स्रोतले जानकारी दिएको छ।

टेलिप्रोमोटरको प्रयोग गरी बनाइएको यो सन्देश नेपाली र चिनियाँ दुवै भाषामा छ। यसको चिनियाँ भाषानुवाद नेपालस्थित चिनियाँ रेडियो इन्टरनेसनल (सीआरआई)का लागि नेपालबाट काम गर्ने वर्षा (झाङ यूइ)ले गरेकी छन्।

जनवरी २५ देखि १५ दिनसम्म चिनियाँले नयाँ वर्ष मनाउँदै आएको छ।