उपप्रधान तथा रक्षामन्त्री ईश्वर पोखरेलले वैदेशिक सहयोग लिँदा राष्ट्रिय स्वार्थका लागि हित हुनेछ भने त्यसमा अवरोध गर्न नहुने बताएका छन्।

राष्ट्रिय सरोकार तथा समन्वय समितिद्वारा मंगलबार काठमाडौंमा आयोजित ‘समावेशी विकास र समृद्धि’ विषयक कार्यक्रममा उनले राष्ट्रिय हित अनुकूल छ भने जुनसुकै देशको पनि सहयोग लिन सकिने स्पष्ट पारे। चिनियाँ सहयोग परियोजना सैन्य गतिविधिसँग सम्बन्धित नभई विकास परियोेजनासँग सम्बन्धित रहेको उनले बताए।  

चीन र जापानको सम्बन्धबारे उदाहरण दिँदै उहाले दुई देशबिच सम्बन्ध राम्रो नभएपनि जापानले गरेको आर्थिक सहायता चीनले लिएको बताए। पोखरेलले समावेशी विकास र समृद्ध नेपालका लागि योजना तर्जुमा, कार्यान्वयन, निरीक्षण तथा मूल्याङ्कनमा तीनै तहका सरकारको सक्रिय संलग्नता र सहभागितामा प्रभावकारी स्रोत परिचालन आवश्यक रहेको धारणा राखे। नेपालले गर्दै आएको अभ्यास र आवश्यकताबीचको अन्तरविरोधलाई पन्छाएर विकास र समृद्धिका लागि ठीक बाटो समातेर सरकार अघि बढिरहेको उनले भनाई छ। 

त्यस्तै अर्थमन्त्री डा युवराज खतिवडाले पूँजी र भूमिको माध्यमबाट हुनेभन्दा ज्ञानको माध्यम्बाट हुने समृद्धिको बजार निकै ठूलो रहेको बताए। उनले अन्तरराष्ट्रिय जगतले नेपालको लोकतन्त्रिक परिपाटीको माध्यमबाट अपनाइएका विकासका प्रणाली, आर्थिक विकासका नीति, स्वरुप, प्राथमिकता र रणनीतिलाई सहर्ष स्वीकार गरेका बताए।

कार्यक्रममा नेपालका लागि अष्ट्रेलियाका राजदूत पिटर वडले सङ्घीयताका माध्यमबाट समावेशी विकास र समृद्धिको बाटोमा अघि बढिरहेको नेपाललाई अष्ट्रेलियाले सहयोग पु¥याउँदै आएको बताए।