काठमाडौं : गत असार ६ गते जानकी मन्दिर परिसरमा एउटा भेला बस्यो।
नेपाल प्रहरी, सशस्त्र प्रहरी, प्रदेशसभा सांसद, मेयर र स्थानीय नेताहरु बैठकमा सहभागी थिए। बैठकले एउटा निर्णय गर्यो- जानकी मन्दिर परिसरलाई सफा र स्वच्छ राख्ने, वरपरको फुटपाथ हटाउने।
असारमा बसेको भेलाले गरेको निर्णयको कार्यान्वन भने हिजोमात्र भयो। जसै निर्णय कार्यान्वयनमा गयो, विवादको एउटा नसोचिएको भिडियो सामाजिक सञ्जालमा फैलियो।
बिहीवार एउटा भिडियो भाइरल भयो जसले नेपाल प्रहरीको सेवा र व्यवहार कति तुच्छ छ भन्ने देखायो। भिडियोमा प्रहरीका असइदेखि जवानसम्म क्रूरतापूर्वक प्रस्तुत भएको देखियो। भिडियोमा तीन जना प्रहरीले मिलेर एक युवकलाई लछारपछार गरी गरेको दुर्व्यवहार प्रहरीलाई बदनाम गर्न पर्याप्त थियो।
भिडियोमा जनकपुर मन्दिर परिसरमा पर्यटन प्रहरीको कमान्डमा पुगेका असइ वीरेन्द्र यादव र प्रहरी जवान उमाशंकर यादवले युवकलाई लछारपछार गरेका थिए। त्यति मात्र होइन युवकले लगाएको लुगा समेत प्रहरीले च्यातेको देखिन्छ। युवकको के गल्ति गरे?
