एनआरएनएका संस्थापक उपेन्द्र महतोलाई प्रमुख संरक्षकबाट बर्खास्त गरिएको छ ।
नवनिर्वाचित एनआरएनए कार्यसमितिको पहिलो बैठकले उनलाई प्रमुख संरक्षकबाट हटाएको हो । महासचिव डा. हेमराज शर्माले जारी गरेको प्रेस विज्ञप्तीले पुष्टि गरेको छ । यसअघि भवन भट्टको कार्यकालमा प्रमुख संरक्षक रहेका उनको नाम हटाइनु एक किसिमले बर्खास्त गरिनुजस्तै हो ।
प्रेस वक्तव्यमा संस्थापक अध्यक्ष डा. महतोलाई संघको उच्च वरियतामा राख्ने पनि भनिएको छ । संस्थापक अध्यक्ष यसै पनि उच्च वरियतामा हुने भएकाले यसको कुनै अर्थ नहुने एनआरएनका अगुवाहरू बताउँछन् ।
पूर्वअध्यक्ष शेष घलेलाई प्रमुख संरक्षक बनाएर गठन गरिएको नयाँ संरक्षक परिषदका संरक्षकमा जीवा लामिछाने, देवमान हिराचन, भवन भट्ट र रामप्रताप थापा रहेका छन् । उनलाई संरक्षक परिषदमा पनि समेटिएन ।
एनआरएनका सबै पूर्वअध्यक्ष अटाएको समितिमा संस्थापक अध्यक्ष नै नअटाउनुलाई रहस्यमय तरिकाले हेरिएको छ । अझ रामप्रताप थापा त पूर्वअध्यक्ष पनि हैनन्, उनी पूर्व उपाध्यक्ष मात्र हुन् ।
संस्थापक अध्यक्ष महतोले एनआरएनमा राजनीति हाबी भएको भन्दै यसपटकको विश्व सम्मेलन नै बहिस्कार गरेका थिए । उनी राजनीतिक विचारका आधारमा प्यानल बनाएर चुनाव लड्ने कुरासँग सहमत थिएनन् । उनले यसो गर्दा चुनाव जित्नका लागि पैसाको खोलो बग्ने र एनआरएन अभियान अरू विभाजित हुने तर्क अघि सारेका थिए ।
