असल कुरा ढल्छन्, हामीलाई दुःख लाग्छ । खराब कुरा ढलेको देख्दा खुसी पनि लाग्छ । तपाईं÷हामीले जीवनमा धेरै कुरा ढलेको देखेका छौँ । विश्वयुद्ध भए, मानवता ढल्यो । बर्लिनको पर्खाल ढल्यो । कहिले टेलिभिजनको पर्दामा देख्यौँ, अजंगका दुई भवन ढले– अमेरिकाको ट्विन टावर । अलि पछि हाम्रैनजिकको धरहरा ढलेको देख्यौँ । त्यसबीचमा अरू धेरै कुरा ढले । मान्छेको सोच, रोजाइ, राज्य व्यवस्था, राजसंस्था, विश्वास, इमान, सदाचार र नैतिकता पनि ढलिरहे । हामीले देखिरह्यौँ ।