बाजुरा- गौमुल–६ सटेडाका गोरे मिजारले तीन दशक बढी मदिरा सेवन गरिरहे। २० वर्षको जवानीदेखि सुरु गरेका मिजारले ५० नाघिसक्दापनि मदिरा खान छोडेनन्। श्रीमतीका गह गहना समेत विक्री गरे, भएको जग्गा जमिनसमेत मदिरा पिउनमै उडाए। मिजार कुनै दिन नबिराई मदिरा सेवन गर्थे।

गरिबीले भोको पेट बस्नुपर्ने त्यसमै गाली कुटपिट दिनहुँ सहनुपर्ने श्रीमती पीडा सहन नसकी पोइला गइन्। मिजार एक्लो भए, तरपनि मदिरा सेवन गर्न छोडेनन्। तर ६ महिनादेखि भने उनले मदिरा सेवनको नाममा छोएका पनि छैनन्।

ठूलै दुःख र कष्ट सहनु परेकै कारण भने मिजारले मदिरा छोडेका होइन्, जब गौमुल गाउँपालिकाले मदिरा सेवन कार्डको नीति बनायो, तब उनी छोड्न बाध्य भए। गाउँपालिकाले मदिरा सेवनकर्ताको हकमा अनिवार्य मदिरा सेवन कार्ड बनाउनुपर्ने र खाँदा साथमा बोक्नु पर्ने प्रावधान ल्याएको छ।

गाउँपालिकाले नीति बनाए लगत्तै सुरुमा मदिरा कार्ड पनि बनाए। एक केही समय कार्ड घाँटीमा राखेरै सेवन पनि गरे। जब गाउँ घर आफन्तहरुले जड्याको नामले बोलाउन थाले, उनलाई सबैभन्दा ठूलो हिनता लाग्यो र मदिरा खानै छोडिदिए।

'सम्पत्ति सकेर श्रीमती पोइला जाँदा पनि मदिरा छोड्न मन लागेन्, जब घाँटीमा जड्याहा लेखेको कार्ड झुण्ड्याएर पसल छिर्नुपर्ने र मदिरा सेवन गर्नुपर्ने भएपछि आत्मादेखि नै लज्जाबोध भयो, विगत बिर्सेर मदिरा पनि चटक्कै छोडेँ' नागरिक न्यूजसँग गोरे मिजारले भने 'एक वर्षजति भो मैले मदिरा छोएकै छैन्, गाउँमा सबैले मेरै उदारण दिएर सुध्रिएको भन्छन्, खुसी लाग्छ मिजारले थपे।'

गौमुल गाउँपालिकाले मदिरा कार्ड विना मदिरा सेवन गर्नेलाई १५ हजार जरिवाना लिने गरेको छ। ५ सय तिरेर कार्ड लिनुपर्ने र प्रत्येक वर्ष नविकरण गर्नुपर्ने प्रावधान राखिएको गाउँपालिका उपाध्यक्ष सिता थापाले बताईन्। गाउँपालिकाले मदिरा कार्ड प्रयोग गर्न थालेको २ वर्ष बितेको छ।