सञ्चार तथा सूचना प्रविधिमन्त्री पृथ्वी सुब्बा गुरुङले नेपाल हुलाक सेवालाई आन्तरिक र अन्तर्राष्ट्रिय तहमा विद्युतीय व्यापारको केन्द्र बनाउनेगरी सरकारले योजना बनाइरहेको बताएका छन्।
विश्व हुलाक दिवसका शुभकामना सन्देश दिँदै उनले हुलाक सेवामार्फत हुने विश्वव्यापी सञ्चारलाई थप प्रभावकारी र आधुनिकीकरण गर्नका लागि सरकार प्रतिवद्ध रहेको पनि बताए।
‘सूचना प्रविधिको प्रयोगसहित नेपाल हुलाकलाई आन्तरिक र अन्तर्राष्ट्रिय तहमा विद्युतीय व्यापारको केन्द्र बनाउने गरी यसलाई सुदृढ गर्दै लैजान सरकार प्रतिबद्ध छ’ उनले भनेका छन्।
उनले आन्तरिक हुलाक सेवामा समेत विविधिकरण गर्नुपर्नेमा जोड दिएका छन्। यसै चालु आर्थिक वर्षमा सरकारले हुलाकको सेवामा विविधिकरण गर्ने योजना बनाइरहेको छ।
विश्वकै दोस्रो पुरानो अन्तर्राष्ट्रिय संस्थाको रूपमा सन् १८७४ अक्टोवर ९ मा स्थापित विश्व हुलाक सङ्घको स्थापना भएको थियो। हरेक वर्ष अक्टोबार ९ तारिखमा विश्व हुलाक सङ्घका सबै सदस्य राष्ट्रमा भव्यताका साथ विश्व हुलाक दिवस मनाउने गरिन्छ। हुलाक संयुक्त राष्ट्र सङ्घको विशिष्टीकृत संस्थाका रुपमा सूतिकृत पनि छ। नेपालमा वि।सं १९३५ मा नेपाल हुलाक घर स्थापना भएको थियो। नेपालले सन् १९५६ मा विश्व हुलाक सङ्घको सदस्यता प्राप्त गरेको थियो।
