राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले पुथ्वी जयन्तीलाई राप्रपाको मात्र कार्यक्रम जस्तो बन्न नदिन आग्रह गरेका छन्।
शनिबार पृथ्वीनारायण शाहको ३०३औं जन्मजयन्ती तथा राष्ट्रिय एकता दिवसका अवसरमा पार्टीले आयाेजना गरेको चियापान कार्यक्रममा अन्य दलका नेताहरूसमक्ष लिङ्देनले सो कुरा बताएका हुन्।
उनले अन्य दल र सरकारलाई पनि पृथ्वी जयन्तीको अवसरमा विभिन्न प्रकारको कार्यक्रमको आयोजना गर्न आग्रह गरे।
उनले भने, ‘राप्रपाले देशभर नै यस्तो चियापान कार्यक्रमहरू आयोजना गरेको छ। पुथ्वी जयन्तीलाई राप्रपाको मात्र कार्यक्रम जस्तो बन्न नदिन अन्य दलहरूले पनि आगामी वर्षबाट यस्ता कार्यक्रम गर्नुस् र सरकारले पनि यस प्रकारको कार्यक्रमको आयोजना गरोस भन्न चाहन्छु।’
चियापान समारोहमा प्रधानमन्त्री केपी शर्मा ओली, सभामुख देवराज घिमिरे, राष्ट्रिय सभाका अध्यक्ष नारायण प्रसाद दाहाललगायत नेताहरूको सहभागिता थियाे।
