मानवसेवा आश्रमले सुरुआत गरेको मेची–महाकाली राष्ट्रिय उद्धार यात्रा अन्तर्गत शनिबार १२ जनाको उद्धार गरिएकाे छ।
‘यो पटकको चाडपर्वमा कसैले बस्न नपरोस् सडकपेटीमा’ भन्ने मूल नाराका साथ मानवसेवा आश्रम र आनी छोइङ डोल्मा फाउण्डेशनको संयुक्त आयोजनामा उद्धार यात्रा सुरु भएको हो।
साेही उद्धार यात्राका क्रममा शनिबार काठमाडौं महानगरपालिकाका विभिन्न वडाबाट १० जना, बुढानीलकण्ठ–४ बाट १ जना र कागेश्वरी मनोहरा नगरपालिका–६ बाट १ जना गरेर १२ जना सडक आश्रित मानवहरूकाे उद्धार गरिएको हो।
असोज २८ गतेबाट झापाको मेचीनगरदेखि सुरु भएको यात्रा २७ औं दिन काठमाडौं आइपुग्दा २०१ जना सडक आश्रित मावहरूको उद्धार गइसकेकाे आश्रमका संस्थापक रामजी अधिकारीले बताए।
उनका अनुसार उद्धार भएका १५५ जना पुरुष र ४६ जना महिला रहेका छन्। जसमध्ये ५ जना बालिका र ४ जना बालक रहेका छन्।
कस्तो संस्था हाे मानव सेवा आश्रम?
‘जसका कोही हुँदैनन्, जसको केही हुँदैन’ उनैको सेवामा सर्पित छ, ‘मानव सेवा आश्रम’। जहाँ १ हजार ७ सय १८ जना सडक मानिस आश्रित छन्।
सातै प्रदेशका १९ जिल्लामा २४ वटा सेवा केन्द्र सञ्चालन गरेकाे आश्रममा असहाय, अशक्त, अनाथ, मानसिक तथा शारीरिक रुपमा कमजोर र सन्तानबाट अपहेलना भएका बाआमा र बालबालिकाहरू छन्। जसको सेवामा निरन्तर खटिरहेको छ मानव सेवा आश्रम।
१२ वर्षदेखि सहयोगापेक्षीहरूको साहारा बनिरहेको आश्रमले हालसम्म १० हजार २ सय ९१ जनाको उद्धार गरिसकेको छ भने ४ हजार ७१ जनालाई पारिवारिक मिलन समेत गराइसकेको छ।
र, २०८२ साललाई सडक मानवमुक्त राज्य बनाउने गैरनाफामूलक सामाजिक संस्थामानव सेवा आश्रमले लक्ष्य लिएको छ।
