देश निर्माणको भारी बोक्छ अखिल (क्रान्तिकारी)’ स्ववियु निर्वाचनका लागि हाम्रो संगठनले तय गरेको नारा हो, यो। यो नारा सार्वजनिक भएपछि मसँग शुभेच्छुक र प्राध्यापकहरूले असन्तुष्ट व्यक्त गर्नुभयो। उहाँहरूले सुझाव पनि दिनुभयो, कम्तीमा विद्यार्थी राजनीति गर्दै गरेका संगठन र तिनका नेतृत्वले शैक्षिक क्षेत्रसँग सम्बन्धित नारा बनाउनुपर्थ्याे ।
झट्ट सुन्दा उहाँहरूको विचार र सुझावमा समस्या छैन । तर, उहाँहरूको यो सुझावले सत्यको आंशिक प्रतिनिधित्व मात्रै गर्दछ । स्ववियु निर्वाचनको सम्मुखमा विद्यार्थी राजनीतिका एजेन्डामाथि बहस हुनु झनै वाञ्छनीय भएकाले यस आलेखमा विद्यार्थी आन्दोलनका केही प्रमुख सवालहरू उठाउने कोसिस गरिनेछ ।
