पाल्पा तानसेनका ख्यातिप्राप्त विद्वान्, प्राध्यापक कवि माधवप्रसाद देवकोटाले आफ्नो पुस्तक ‘हुस्सु पथिक’ काव्यमा वारुणी अर्थात मदिराको बारेमा लेख्नुभएको छ। यो पुस्तकको भूमिका महाकवि लक्ष्मीप्रसाद देवकोटाले लेख्नुभएको थियो।
त्यो प्रशंग जोड्नुको कारण छ। यसै प्रदेश अर्थात ग्रासरुट अभियान प्रशिक्षण कार्यक्रममा संबोधन गर्न अर्घाखाँची पुगेका एमाले अध्यक्ष केपी शर्मा ओलीले मदिराका बारेमा बोल्दै भनेछन्–रक्सी खाने मान्छे एमाले हुन सक्दैन! साँझ पर्न नपाउँदै सिधा उभिएर हिँड्न नसक्ने मान्छे देखियो भने त्यो एमाले होइन भनेर सबैले जाने हुन्छ।
ओलीको जँड्याहा, ट्वाकेहरू एमाले हुनसक्दैन भन्ने भनाइ यतिखेर सामाजिक सञ्जालमा भाइरल भैरहेको छ। सत्तापक्ष राजधानी काठमाडौँमा सरकार बनाउने सकसमा ठेलमठेल गरिरहँदा प्रमुख प्रतिपक्षी नेता लुम्बिनी प्रदेशको जिल्ला–जिल्लामा पार्टी शुद्धीकरण, सुदृढीकरण र सशक्तीकरणमा लागेको देखियो। एमाले अध्यक्ष ओलीले सत्ताबाट आफ्नो पार्टी बाहिरिनु परेकामा भँडास त पोख्लान् नि भन्ने धारणा बनाइरहेका बुद्धिजीवी, विश्लेषक, पत्रकार र राजनीतिज्ञहरूलाई ओलीले आश्चर्यमा पनि पारेका छन्। सुदृढीकरण मात्र होइन, राजधानीमा आएका मिटरब्याजीपीडितको आवाज पनि प्रतिपक्षी नेताले बोल्नुपथ्र्यो। उनले भन्नुपथ्र्यो–बिचौलिया, दलाल, माफिया, अपराधी र मिटरब्याजीहरू एमाले हुन सक्दैनन्। यिनीहरूलाई गाउँ–गाउँबाट लखेट भनेर आह्वान गर्न सक्नुपथ्र्यो ओलीले।
पार्टीका नेता, कार्यकर्ता र शुभेच्छुकहरूलाई ओलीले केबाट सचेत गराउन खोजे भने मदिरा, रक्सी, जाँड, ह्विस्की, भोड्का, वाइन पिएर एमालेको न संगठन बन्छ नत समृद्ध नेपाल सुखी नेपाली नै। यसका लागि उनले आफ्नो दृष्टि, विचार र ब्यवहारलाई स्वच्छ, तीक्ष्ण र जनतालाई केन्द्रविन्दुमा राखेर पूरै पार्टी अगाडि बढ्नुपर्ने विचार ब्यक्त गरेर हिँड्नुपर्ने कुरामा जोड दिएको देखियो। के त्यस्तै छन् त एमाले नेता/कार्यकर्ता?
