आवश्यक गहुँ दिन भारत तयार भए पनि नेपाल सरकार उदासिन बन्दा त्यसले अन्तिमरूप पाउन सकेको छैन। जसका कारण नेपालीले महँगो मूल्य तिर्नुपरिहेको छ।
भारतले आफ्नो खाद्य सुरक्षा व्यवस्थापन एवं छिमेकी तथा जोखिमयुक्त देशलाई सहयोग गर्न गहुँ निर्यात रोकेको थियो। भारतीय नीतिले नेपाली उपभोक्ता मारमा पर्ने भएपछि नेपालको आवश्यकताअनुसार गहुँ दिन भारत तयार हुँदासमेत सरकारी पहलकदमी पर्याप्त हुन सकेको छैन।
भारतले बारम्बार नेपालमा खपत हुने गहुँको तथ्यांक मागिरहेको छ। तर, नेपालले अन्धाधुन्ध तथ्यांक पठाइदिएको र उक्त तथ्यांकमाथि भारतले थप शंका गरेपछि गहुँ आयात खुल्न सकेको छैन। सरकारले आफूले तयार पारेको तथ्यांक नदिई निजी क्षेत्रसँग मागेर दिएका कारण भारतीय पक्षले विश्वास नगरेपछि गहुँ आयात हुन सकेको छैन।
