खाद्य व्यवस्था तथा व्यापार कम्पनीले दसैँ लक्षित सहुलियत पसलमा खाने तेल र दालको मूल्य घटाएको छ। 

सहुलियत पसलमा बजारमा भन्दा महँगो भएको जनगुनासो आएपछि कम्पनीले मूल्य घटाएको हो।

मंगलबारबाटै लागू हुने गरी खाने तेलमा प्रतिलिटर १० रुपैयाँ र मुसुरोको दालमा प्रतिकिलो ८ रुपैयाँ घटाएर बिक्री गर्न लागेको कम्पनीले जनाएको छ। 

अब सहुलियत पसलमा सुर्यमुखी तेल प्रतिलिटर २८५ रुपैयाँ, तोरीको तेल प्रतिलिटर २७५ रुपैयाँ र भटमासको तेल २४० रुपैयाँ पर्छ।

त्यस्तै मुसुरोको दाल प्रतिकिलो १५३ रुपैयाँबाट घटाएर १४५ रुपैयाँ निर्धारण गरेको छ।

कम्पनीले यसअघि पनि खानेतेलमा प्रतिलिटर ७ रुपैयाँ घटाएर बिक्री गरेको बताएको थियो।

कम्पनीले उक्त दाल र तेल साल्ट ट्रेडिङबाट खरिद गरेको बताएको छ। तर सहुलियत पसलमा खानेतेलको मुल्य बजारमा भन्दा महँगो रहेको पाइएको छ। 

होलसेल बजारमा प्रतिलिटर २५० रुपैयाँ पर्ने तोरीको तेल सहुलियत पसलमा २७५ रुपैयाँमा बिक्री भइरहेको छ।

त्यस्तै  बजारमा प्रतिलिटर २५० रुपैया पर्ने सुर्यमुखी तेल र २१८ रुपैयाँ पर्ने भटमासको तेलको मूल्य सहुलियत पसलमा क्रमशः २८५ र २४० रुपैयाँ रहेको छ।