प्रदेश १ को हिमाली जिल्ला सोलुखुम्बुमा विविध कारणले नेपाली नागरिकता परित्याग गर्नेको संख्या बढ्दै गएको छ।
पछिल्लो समय रोजगारीका लागि विदेश जानेको संख्या बढेपछि नेपाली नागरिकता परित्याग गर्नेको संख्या बढ्दै गएको हो। जिल्लाबाट २०६६ सालयता २२ जनाले नागरिकता त्यागेका छन्।
सोही अवधिमा दुई जनाको नागरिकता रद्द गरिएको छ। जिल्ला प्रशासन कार्यालयका अनुसार यसरी नागरिकता परित्याग गर्नेमा ११ पुरुष र ११ महिला छन्। तीमध्ये अधिकांश अमेरिकामा बसोबास गर्दै आएका छन्।
केही समययता बाह्य मुलुकमा पर्याप्त सम्भावना र अवसरहरू देखेर नागरिकता त्याग्नेको संख्या बढ्दो छ। कानुनमा एक व्यक्तिले दुई देशको नागरिकता लिन नपाउने व्यवस्था भएकाले कुनै पनि नेपालीले नागरिकता त्याग गर्न चाहेमा नागरिकता ऐन २०६३ को दफा १० बमोजिम जिल्ला प्रशासन कार्यालयमा निवेदन दिनसक्ने व्यवस्था गरिएको छ।
