जुम्लाको पातारासी गाउँपालिकामा- ३ हुरीमहरीमा रहेको सरस्वती आधारभूत विद्यालयको भवन भत्किँदा चार जना विद्यार्थी घाइते भएका छन्। कक्षा सञ्चालन भइरहेको समयमा विद्यालय भवन भत्किएपछि विद्यार्थी घाइते भएकाे शिक्षक डिल्ली बुढाले बताए।
उनकाअनुसार घाइते हुनेमा कक्षा ३ र ४ का विद्यार्थी रहेका छन्। घाइते मध्ये एकजनाको अवस्था गम्भीर छ।
'निकै पुरानो र जीर्ण भएको तीन कोठे भवन भत्किएको छ,' उनले भने, 'विद्यालय भवन भत्किने बित्तिकै पालिकालाई खबर गरेको र पालिकाबाट टोली विद्यालयमा आउन लागेको छ।'
पातारासी गाउँपालिका प्रमुख प्रशासकीय अधिकृत विष्णु धितालले विद्यालयको भवन भत्किएर विद्यार्थी घाइते भएको खबर प्राप्त भएको बताए।
'भवन भत्किएको खबर पाउने बित्तिकै डिल्लीचौर प्रहरीचौकीबाट प्रहरी र शिक्षा शाखाको टोली घटनास्थलतर्फ प्रस्थान गरेको छ,' उनले भने। विद्यालय क्षेत्रमा फोन नलाग्ने भएकोले विस्तृत विवरण प्राप्त गर्न नसकिएको पातारासी गाउँपालिकाले जनाएको छ।
