फलामका सरियाहरू (रड) ठड्याएर ठेकेदार भागेपछि अहिले त्रिभुवन मा.वि.देखि गोल्छासम्मको नाली धरापका रुपमा परिणत हुँदै गएको छ।
ठेकेदारको लापरबाहीका कारण कोहलपुर–नेपालगञ्ज सडकखण्डमा पर्ने त्रिभुवन माध्यमिक विद्यालयदेखि गोल्छासम्मको नाली निर्माणको काम अलपत्र परेको छ।
कोहलपुर नगरपालिकाले त्रिभुवन माध्यमिक विद्यालयको साइडदेखि गोल्छासम्म नाली निर्माण गर्ने गरी १ करोड १५ लाख बजेट विनियोजन गरे पनि ठेकेदारले लापरबाही गर्दा राज्यको करोडौँ रुपैयाँको योजना अलपत्र परेको हो।
ठेकेदारले नाली निर्माण नगरी भागेका कारण स्थानीयवासी समस्यामा छन्।
नाला निर्माण अलपत्र हुँदा बच्चाहरु स्कुलबाट आउन जान, व्यापार/व्यवसाय गर्ने र पानीको निकास नहुँदा डुबानको हुने समस्या भोग्नु परेको स्थानीयवासी बताउँछन्। नाली निर्माणको काम ठेकेदारले बीचमै छोडेको ४ महिना भयो, त्यसैले विभिन्न किसिमका समस्या झेल्न पर्ने बाध्य भएको स्थानीयवासी रामु वली बताउँछन्।
‘नाली बनाउने भनेर ठेकेदार फलामका सरियाहरू ठड्याएर भागेका छन्,’ उनले भने, ‘ठड्याएको फलाममा परेर स्कुले बालबालिकालाई चोटपटक लागेको छ, एक जनाको त पेटमा चोट लाग्यो।’ उनले नाली चाँडै नबने पुरिदिने चेतावनीसमेत दिए।
यस्तै बच्चाको आमा जीवना थापाले नेपालगञ्ज मेडिकल कलेजमा उपचार गर्ने लगेकी थिइन्। ‘५ हजार उपचार खर्च लाग्यो,’ थापाले भनिन्, ‘पेटमा छाला गएको थियो।’ तर, फलाम चोट लागेका कारणले गर्दा सिरिन्जको प्रयोग भयो र अहिले औषधि प्रयोग गरिरहेको थापाको भनाइ थियो।
स्थानीय तारा रानाकाअनुसार पसलमा आउने ग्राहकलाई आवतजावतमा समस्या भएको छ। यहाँ चामल, किराना र नास्ता पसलसमेत छन्। नाली अलपत्र छाडिँदा त्यहाँ आउने ग्राहकलाई अप्ठ्यारो भएको छ।
अहिले फलामका सरियाहरू माथिबाट काठ फल्ला बिच्छाएर आवतजावत गर्ने गरेको उनी बताउँछिन्। अहिले त्यो अलपत्र नाली धराप बन्दै गएको छ। यसले चोटपटकको जोखिम बढाएको छ।
पहिलो स्थानीय तहका प्रमुखहरुलाई भनेकाे भएपनि सुनुवाइ नभएकाे तर अहिलेका नगर प्रमुख पूर्ण आचार्यसँग डेलिकेशन गएकाे स्थानीय श्यामसिह ठकुरीले बताए।
‘हामी डेलिकेशन जाँदा तुरुन्तै ठेकेदारहरुलाई फोन गरी काम सम्पन्न गर्नुहोला नत्रभने भुक्तानी हुँदैन। भन्नुभएको थियो। तर ठेकेदारले नाली निर्माण नगरी फरार भए,’ उनले भने, ‘यो ठेक्का असार मसान्तसम्म निर्माण भइसक्नुपर्ने हो तर असार मसान्त सकिएपनि अझै ५० प्रतिशत पनि काम भएको छैन।’ यहाँका स्थानीयहरुले बिहान उठेदेखि राति नसुत्दा समेत यो समस्या भोगिरहेका ठकुरीले बताउँछन्।
यस्तै निर्माण कार्य सम्पन्न नभएका सबै योजनाहरुको भुक्तानी नदिने भनी नगरप्रमुख आचार्यको आदेशअनुसार सो नाली पनि निर्माण कार्य सम्पन्न नभएकोले भुक्तानी रोकिएको नगरपालिकाका प्रमुख इन्जिनियर बालकृष्ण महतरा बताउँछन्।
नाली निर्माणको काम २०७८ फागुन १७ गते मंगलबारदेखि नालीको काम सुरु भएको थियो भने ललितपुरको दिभा र यति जेभीसंग सम्झौता भएको थियो। ‘असार मसान्तसम्म निर्माण गरिसक्नुपर्ने भनी सम्झौता भएको थियो’ उनले थपे, ‘तर सम्पन्न हुन सकेन।’
हामीले एकैपटक ५ वटा वडामा त्रिभुवन माध्यमिक विद्यालयदेखि गोल्छासम्म नाली निर्माण (१ किलो मिटर), हाइस्कुलदेखि बुद्धचोक जाने बाटो कालोपत्रे (१४ सय मिटर), राप्तीनगर र सुन्दरनगरमा सडक कालोपत्रे (७ सय ६० मिटर), सिद्धनगरमा कालोपत्रे (१ हजार ५ सय मिटर), त्रिभेणी मोड हुँदै दाङ्गपुरसम्म नाली (८ सय मिटर) र दुई कल्भट निर्माण गर्नका लागि ४ करोड ९७ लाखमा सम्झौता गरेको प्रमुख इन्जिनियर महतराले बताए। प्रदेश सरकारबाट आएको बजेट फ्रिज भैसकेको छ। स्थानीय सरकारले क्रमागत बजेटमा पर्याे भने काम अगाडि बढ्छ नत्रभने काम अगाडि नबढ्ने महतराले बताए।
कोहलपुर नगरपालिका प्रमुख प्रशासकीय अधिकृत टिकाराम ढकालले प्रदेश सरकार र स्थानीय सरकारको ५०/५० प्रतिशत लगानीमा ठेक्का भई काम सुरु भएको बताए। जति काम भयो त्यति नै भुक्तानी भएको छ। सम्झौता रकमको कुल रकमबाट १ करोड ९८ लाख मात्र भुक्तानी भएको छ, अरु भएको छैन ढकालले बताए।
कोहलपुर नगरपालिका प्रमुख पूर्णप्रसाद आचार्यले काम नगर्ने निर्माण व्यवसायीहरुलाई कारवाहीको दायरामा ल्याउन लागेको बताए। ‘अबको केही दिनमा हुने कार्यपालिकाको मिटिङ्गबाट समयमै काम सम्पन्न गरेका/नगरेकाको लिष्ट तयार हुँदैछ,’ उनले भने, ‘सो विषयमा कार्यपालिकाबाट निर्णय भएबमोजिम कारवाही अगाडि बढाउँछौं।’
त्रिभुवन माध्यमिक विद्यालयदेखि गोल्छासम्मको नाली निर्माणको काम अलपत्र भयो भनी त्यहाँका स्थानीयहरु आएकाे र उनीहरूकै अगाडि निर्माण व्यवसायीलाई नै फोन गरी तुरुन्त काम सम्पन्न गर्ने अनुरोध गर्दा पनि नमानेपछि भुक्तानी राेकेकाे आचार्यले बताए।
यस विषयमा बुझ्न ललितपुरको दिभा र यति जेभी कन्ट्रक्सनले फाेन गर्दा उठाएनन्।
.jpg)
