पञ्चायतकालका अन्तिम वर्षहरू, राजनीतिक कारणले त्यतिवेला कलेजमा नियमित भर्नासमेत हुँदैन थियो । नेपाल ल क्याम्पसमा ०४१ सालपछि एकैपटक ०४३ सालमा बिएलमा भर्ना खुल्यो । आइएल पढेका दुई ब्याचका विद्यार्थी एकैपटक भर्ना हुँदा ०४३ को बिएल ब्याच ठूलो हुन गयो । एक सय ५९ जना विद्यार्थीलाई दुई सेक्सनमा पढाइ हुन्थ्यो ।
०४६ मा बिएल पास गरेको त्यो ब्याच ठूलो मात्र भएन, कलेजको इतिहासकै एउटा सफल र प्रभावशाली टोली बन्न पुग्यो । त्यही ब्याचका दुई विद्यार्थी निजामती प्रशासनको सर्वाेच्च पद मुख्यसचिव बन्न पुगे । अन्य पाँचजना हाल विशिष्ट श्रेणीमा कार्यरत छन् । निजामती मात्र नभई अन्य विभिन्न क्षेत्रमा यो ब्याचका विद्यार्थी अब्बल भएर हाल आ–आफ्नो क्षेत्रमा सफलता चुमेका छन् ।
