युट्युबमा भाइरल बनेकी सन्तोषी सुब्बाको हत्या अभियोगमा प्रहरीले एक जनालाई पक्राउ गरेको छ।
पक्राउ पर्नेमा सिन्धुपाल्चोक चौतारा साँगाचोकगढी १४ घर भई हालै दक्षिणकाली नगरपालिका-७ मा बस्ने २९ वर्षीय सुरेश तिमल्सिना रहेका छन्।
महानगरीय अपराध महाशाखा र महानगरीय प्रहरी परीसर काठमाडौँको टोलीहरुले संयुक्त अनुसन्धान गर्ने क्रममा उनी पक्राउ परेका हुन्।
गत आइतबार सुब्बाले आफूलाई खान बस्न समस्या भएको तिमल्सिनालाई बताएकी थिइन्। सोही कुराको फाइदा उठाउँदै उनले सुब्बालाई खाना र सुत्ने व्यवस्था मिलाइदिन्छु भन्दै दक्षिणकाली मन्दिर लगेर जबर्जस्ति गर्न खोजेका थिए।
तर सन्तोषीले प्रतिकार गरेपछि तिमल्सिनाले घाँटी थिची हत्या गरे पश्च्यात ढुंगाले अनुहारमा पटकपटक प्रहार गरेको प्रहरी अनुसन्धानले खुलाएको छ।
हत्या गरेर फरार रहेका तिमल्सिनालाई बुधबार लुकिछिपी बसेको स्थान काठमाडौँ-२७ कमलाक्षी इनवहालबाट महानगरीय अपराध महाशाखाबाट खटिएको टोलीले पक्राउ गरेको हो। पक्राउ परेका उनीमाथि थप अनुसन्धान भइरहेको प्रहरीले बताएको छ।
