कतारको अदालतबाट कम्पनी परिवर्तनको अनुमति पाएर पनि कार्यरत कम्पनीको अन्यायका कारण एक नेपाली युवाले महिनौंदेखि अलपत्र पर्नु परेको छ । कपिलवस्तुको शिवराज नगरपालिका–५ चन्द्रौटा घर भएका खेमराज खनालले पुरानो कम्पनीको अन्यायका कारण अर्को नयाँ कम्पनी परिवर्तन गर्न नपाएका हुन् । 

खनाल कतारस्थित हस्सानेस्को ट्रेडिङ एन्ड कन्ट्रयाक्टिङ कम्पनीमा ७ वर्षदेखि कार्यरत थिए । त्यहाँ उनको कामको क्षमता विकास भए पनि पारिश्रमिक बढ्न सकेको थिएन । 

नयाँ कम्पनीबाट राम्रो रोजगारीको अफर आएपछि उनले पुरानो कम्पनी छाड्न खोजे । कतारमा कुनै कम्पनीमा ५ वर्षसम्म काम गरेपछि स्वेच्छाले कम्पनी परिवर्तन गर्न पाउने कानुनी व्यवस्था छ । 

‘त्यही आधारमा मैले काम गरिरहेको कम्पनीको म्यानेजरलाई भेटेर कम्पनी परिवर्तन गर्न चाहन्छु भन्ने अनुरोध गरेँ । उहाँहरूले हामी दिँदैनौं भन्नुभयो,’ कतारबाट खनालले पर्दाफासलाई भने, ‘मैले यहाँको नियम कानुनले दिन्छ भने म कम्पनी परिवर्तन गर्छु भनेँ । उहाँले मेरो क्युआईडी क्यान्सिल गर्नुभयो ।’

त्यसपछि आफूले लेबरकोटमा उजुरी दिएको उनले बताए । कोठामा पुग्दा कम्पनीका दुई जना मान्छे आएर ‘म मेरो मर्जीले घर जान चाहन्छु कम्पनीले कुनै जबर्जस्ती गरेको छैन’ उल्लेख गरिएको कागजपत्रमा हस्ताक्षर गर्न भनिएको र आफूले नगरेको खनालले बताए । 

यसबारे कतारस्थित नेपाली दूतावासलाई पटकपटक जानकारी गराए पनि साथ पाउन सकेको उनले जानकारी दिए । ‘अदालतमा गएको विषयमा दूतावास बोल्न मिल्दैन भनेर टार्नुभयो, यत्तिकैमा ४ महिना बित्यो,’ उनले भने । 

उनले फेरि त्यहाँको सुप्रिम कोटमा उजुरी दिए । गत ३ फेब्रुअरीमा अदालतबाट उनलाई कम्पनीबाट पाउनुपर्ने १५ हजार ९९७ कतारी रियाल, घर जान चाहेमा टिकट र कतारमै रहन चाहेमा टिकट बराबरको रकम अनि यहाँको कानुन अनुसार कम्पनी परिवर्तन गर्न पाउने दिनुपर्ने फैसला भयो ।