नेपालको राजनीतिमा गणेशमान सिंह ‘आइरन म्यान’ (लौह पुरुष) का रुपमा परिचित छन् ।
२००७ सालमा राणा शासनविरुद्ध हुँकार गर्ने, जस्तोसुकै यातनासँग पनि नगल्ने, नेपालको पहिलो ‘जेल ब्रेकर’, ०४६ सालको जनआन्दोलनको ‘सर्वोच्च कमाण्डर’ सिंहलाई चिनाउने विम्ब हुन् ।
नेपाल र नेपाली जनताको स्वतन्त्रताका लागि आफुलाई होमेका सिंहको राजनीतिक अडान, त्याग र बलिदान मात्र होइन उनले लगाउने पहिरन र चढ्ने जीपसमेतको छाप नेपालीको मन मतिष्कमा अझै ताजा छ ।
सहास मात्र होइन सिंह त्यागका समेत प्रतिविम्ब बनेका छन् । ०४६ सालको जनआन्दोलनका सर्वोच्च कमाण्डर भएर आन्दोलनको कमाण्ड सम्हालेका सिंहको व्यक्तित्व त्यतिबेला ‘टावरिङ’ बन्न पुग्यो जब उनले आन्दोलन सफल भएर प्रजातन्त्र पुनःस्थापनापछि तत्कालीन राजा वीरेन्द्र वीरविक्रम शाहले प्रधानमन्त्री बन्न राखेको प्रस्ताव अस्वीकार गरे ।
