अङ्ग्रेजको शासन नीति दाग्ने
स्वतन्त्रता खातिर नित्य जाग्ने
छोरी हुँदा वीर पिता छुटायो
दुर्भाग्यले दुःख सबै जुटायो
प्यारो विदेशी अनुराग गर्ने
आजन्म साथी सुख शान्ति छर्ने
पत्नी हुँदा ती पति नै छुटायो
दुर्भाग्यले चित्त पुनः फुटायो
आफन्तको मोह लता घटाई
प्रजा सबैको हितमा खटाई
आमा हुँदा पुत्रहरू छुटायो
दुर्भाग्यले फेरि यसै टुटायो
यो देशलाई निकटस्थ चिन्ने
अन्यायमा न्याय गरेर छिन्ने
नेता हुँदा मित्र सबै छुटायो
दुर्भाग्यले आसन नै लुटायो
भयो अझै दुःख न थप्नु भन्दै
पुकार गर्छौँ अतिनम्र बन्दै
ती राज्यमाता अब छोडिदे लौ
हे भाग्य! त्यो बन्धन तोडिदे लौ !
