राष्ट्रिय खेलकुद परिषद् (राखेप) को आयोजनामा खेलकुद अभिमुखीकरण कार्यक्रम बुधबारदेखि सुरु भएको छ। 

भक्तपुरको बोडेस्थित कृषि विकास बैंकको तालिम केन्द्रमा उक्त कार्यक्रम सुरु भएको हो। वागमती प्रदेश स्तरीय कार्यक्रमको युवा तथा खेलकुद मन्त्री दावा तामाङले कार्यक्रमको उद्घाटन गरेका हुन्। 

कार्यक्रममा खेलाडी, प्रशिक्षक, बागमती प्रदेश अन्तर्गत जिल्ला खेलकुद विकास समितिका कार्यालय प्रमुखलगायतको सहभागिता रहेको थियो। 
 
दुईदिने कार्यक्रमको पहिलो दिन राखेपका सदस्य–सचिव रमेशकुमार सिलवालले स्पोर्ट्स म्यानेजमेन्ट, डा. सुरेनबहादुर कार्कीले योगा र नेचुरोप्याथी, डा. ज्ञानेन्द्रविक्रम शाहले स्पोर्ट्स मेडिसिन र रिता प्रजापतिले जेन्डर इक्विटी इन स्पोर्ट्स सोसियोलोजी बारे बताएका थिए।
 
दोश्रो दिन पनि विज्ञहरु सहभागीलाई विभिन्न विषयमा जानकारी गराउने छन्। यसअघि कर्णाली, सुदूरपश्चिम र लुम्बिनी प्रदेशको अभिमुखीकरण कार्यक्रम सम्पन्न भएको थियो। बाँकी दुई प्रदेशमा पनि सो कार्यक्रम हुनेछ।