तत्कालीन नेकपा एमालेमा हुँदा र माओवादीसँग एकीकरण भएपछिको नेकपाका कार्यक्रमहरुमा समेत वामदेव गौतमले एउटा भनाइ दोहोर्याउने गर्थे– ‘पार्टीमा आँट भएको नेता मै हुँ। मैले पार्टी फुटाएर चेतिसकेँ। अब कसैले यो पार्टी फुटाउने आँट गर्ने छैन।’
२०५४ सालमा नेकपा–एमालेबाट छुट्टिएर नेकपा–माले गठन गरेका गौतम चार वर्षपछि एमालेमै फर्किएका थिए।
२०५६ सालको आमचुनावमा मालेले शून्य सीट प्राप्त गरेपछि उनको पार्टी अघि बढ्ने अवस्था रहेन।
२०५८ सालमा एमालेमा फर्किएपछि पनि पूर्वमालेका नेता कार्यकर्ताको साथ उनलाई नै थियो। मुख्य एजेन्डाहरुमा उनीहरु गौतमसँगै उभिन्थे।
सबै जिल्लामा आफ्नो कार्यकर्ता रहेका गौतम एमालेभित्र ‘किङमेकर’ को भूमिकामा लामो समय रहे।
गौतमको एकप्रकारको सांगठनिक शक्ति छदै थियो भने उनको स्वभाव र शैलीको पनि एउटा प्रभाव थियो। कुनै एजेन्डाबारे निर्णायक अवस्था आइपर्दा आफूलाई लागेको कुरा पार्टी बैठक र अन्यत्र पनि सोझै राख्ने गौतमलाई आफ्नो पक्षमा पार्न सबैको जोड हुन्थ्यो।
