काठमाडौं । प्रधानमन्त्री केपी शर्मा ओलीले प्रतिनिधिसभा विघटन गरेर मध्यावधि चुनावको घोषणा गरेसँगै राजनीतिक दलहरु आन्दोलनलाई निरन्तरता दिने या चुनावको तयारीमा जुट्ने भन्ने दोधारमा छन् ।
त्यसो त, नेपाली काँग्रेस, नेकपाको प्रचण्ड–माधव पक्ष र जनता समाजवादी पार्टी (जसपा) नेपालले प्रतिनिधिसभा विघटनविरुद्ध प्रदर्शन तथा विरोधसभा गर्दै आएका छन् । त्योसँगै ती दलका केही नेता आफ्नो चुनाव क्षेत्र सुनिश्चित गर्ने, मतदातासँग सम्बन्ध बढाउने र संगठन विस्तारलाई महत्त्व दिने काममा पनि जुट्न थालेका छन् ।
त्यही क्रममा जसपा नेपालका वरिष्ठ नेता राजेन्द्र महतो आफ्नो चुनाव क्षेत्र छनोटमा लागेका छन् । २०७४ सालको प्रतिनिधिसभा निर्वाचनमा धनुषाबाट उम्मेदवारी दिइ विजयी भएका उनी त्यसअघि सर्लाहीबाट उम्मेदवारी दिने गर्दथे । वैशाखमा चुनाव हुने नै अवस्था आएमा कहाँबाट उम्मेदवारी दिने भन्ने सन्दर्भमा महतोले आफ्नो क्षेत्र छनोटको तयारी थालेका हुन् ।
