महेश कार्की

‘जीवनमा पहिलोपटक नेपाली हुनुमा लज्जास्पद भयो,’ २ अगस्त २०१५ मा राजेश हमालले स्टाटस लेखे, ‘डोमलाई इनार छुन नदिन जब पूरै गाउँ उल्टियो’ शीर्षकको समाचार सेयर गर्दै । उनको यो स्टाटस सामाजिक सञ्जालमा बहसको विषय बन्यो ।  समाचार पनि उनीसँगै सम्बन्धित थियो । सिराहाको साबिक धनगढी गाविस–३ स्थित नयनपुरका दुई घर डोमलाई कथित उच्च जातका मानिसले इनार छुन दिँदैनथे ।  यो थाहा पाएर राजेश हमाल त्यहाँ पुगेका थिए, गाउँलेलाई केही चेतनाका कुरा बुझाउन सकिन्छ कि भनेर । जब इनार छुन नदिन पूरै गाउँले उल्टियो, उनी अवाक् भए ।  राजेश हमाल कहिल्यै कुनै त्यस्ता अनावश्यक विवादमा आएनन् । तर, उनलाई विवादमा ल्याइयो । विवादको विषय पनि कुनै नैतिक आचरण, आक्षेप वा राजनीतिसम्बन्धी थिएन । थियो त, ‘राजेश हमाललाई महानायक मान्ने कि नमान्ने’ भन्ने । यस्तो पनि विवाद हुन्छ ? राजेशका फ्यानहरु उनकै पक्षमा लागे, लागिरहेछन् ।