बालकृष्ण मैनाली ।
कोरोना महामारी कायमै छ । यसको कहिले टुंगो लाग्ने हो, कुनै निश्चित छैन । जे–जस्तो नाम राखेर यो वा त्यो भनी जे–जे फलाके पनि यस महामारीलाई राष्ट्रिय अन्तर्राष्ट्रिय राजनीतिमा प्रयोग गर्ने काम भएको छ । उक्त कार्यले निरन्तरता पाइरहेको पनि छ । मै हुँ भन्ने कहलिएका देशहरु पनि कोरोनालाई नियन्त्रित गर्ने भन्दै कोरोनाको समस्यालाई आफ्नो कुत्सित राजनीतिक फलिफापको आशामा कोरोनाको विषयलाई आफ्नो राजनीतिक साधन बनाउने कार्यमा लागिपरेको तथ्य कसैबाट छिपेको छैन । यसरी कोरोनाको नाम भजाउँदै मानवहितभन्दा पनि शासक हितलाई प्राथमिकतामा राखी राजनीतिको प्रयोग भैरहेको बेलामा कुनै पनि देश अछूतो हुन्छ भनेर कल्पना गर्नु सर्वथा अनुचित नै हुन्छ । यसै मेसोमा यो कुराको हाम्रा छिमेकी मुलुक पनि अछूतो छैनन् है भन्ने कुरा नेपालको भूभागसमेत जोडिएको क्षेत्रमा वर्तमानमा देखिएको छिमेकीसँगको माथापच्ची र किचलो पछिल्लो उदाहरण बन्न पुगेको छ ।
हुन त जे कुरामा पनि विरोध नै गर्ने, समर्थनचाहिँ राम्रो काममा पनि नगर्ने भनी बारम्बार दोषारोपण हुँदै आएको छ । वास्तवमा त्यो कुरा सत्य होइन, राम्रो काम र भनाइलाई देशका जनजनले साथ दिन्छन् भन्ने कुराको वर्तमान अवस्थामा जनजनले नक्सा सार्वजनिक गरेको विषयलाई सरकारलाई दिएको साथ नै यथेष्ट प्रमाण हो । यो भन्दा दरिलो प्रमाण अरु खोज्न जानुपर्दैन । सुन्दा र भन्दा तत्काल तीतो त अवश्यै लाग्ला तर त्यहाँ मीठोको समिश्रणको प्रतिशत पनि अत्यधिक हुन्छ भन्ने कुरालाई मनन गर्न सक्यो भने त्यसले देश र जनतालाई हित नै गर्दछ । यस्ता कुरालाई शासित वर्गले अनुभूति गर्न सक्यो र सोही अनुसार आफ्नो नीतिलाई परिमार्जन गरेर अवलम्बन गर्न सक्यो भने भविष्यका पुस्ताले सदैव गुणगान गाइरहने वातावरण निर्माण हुन पुग्छ ।
