लिपुलेक अतिक्रमण गरेर भारतले सडक निर्माण गरेको विरोधमा प्रदर्शनमा उत्रिएका मानवअधिकारवादी कृष्ण पहाडीलगायत पक्राउ परेका छन् ।

मंगलबार बिहान लैनचौरस्थित भारतीय दूतावासअगाडि प्रदर्शन गर्ने गएका पहाडीलगायतका अधिकारकर्मीलाई प्रहरीले नियन्त्रणमा लिएको हो ।

प्रदर्शनमा उत्रिएकाहरूले ‘लिपुलेक सडक निर्माण तत्काल रोक’, ‘अतिक्रमण बन्द गर’ ‘लिम्पियाधुरा र लिपुलेक नेपाली भूमि हो’, ‘भारतीय सेना फिर्ता जाउ’,‘नेपाली भूमि मिच्न पाइँदैन’,लगायत प्लेकार्ड बोकेर भारतीय रवैयाविरुद्ध प्रदर्शन गरेका थिए ।

 भारतले नेपाली भूमि अतिक्रमण गरेर सडक निर्माण गरेपछि त्यसको चौतर्फी विरोध भइरहेको छ । यसको विरोधमा केही दिनदेखि काठमाडौं उपत्यकालगायत देशका विभिन्न भागमा प्रदर्शन भइरहेका छन् ।