नेकपा उपाध्यक्ष वामदेव गौतमले आफू र प्रधानमन्त्री केपी शर्मा ओलीबीच पार्टीभित्र देखिएको समस्या समाधानका विषयमा शनिबार छलफल हुँदा पार्टी कमिटीका बैठकहरु डाकेर समाधान खोज्न सुझाव दिएको प्रष्ट पारेका छन् ।

प्रधानमन्त्रीसँगको भेटवार्ताबारे आइतबार प्रेस नोट जारी गर्दै उनले आफूले सुझाव दिँदा प्रधानमन्त्रीले सुनेको र थोरै मात्र बोलेको जानकारी दिए ।  

‘हिजो (१३ गते) प्रधानमन्त्री केपी ओली र मेराबीच भएका कुराकानीका सम्बन्धमा मनमौजी किसिमले टिकाटिप्पणी भएको मैले पाएँ’, उपाध्यक्ष गौतमद्वारा जारी प्रेस नोटमा भनिएको छ, ‘पार्टीभित्र र पार्टी र सरकारका बीच, अनि अन्य पार्टी र सरकारका बीच उत्पन्न समस्या समाधान कसरी गर्ने भन्ने सम्बन्धमा छलफल भएको थियो।’

उपाध्यक्ष गौतमले अध्यादेश खारेज गरिएपछि पनि पार्टीभित्र अनेकौँ समस्या रहेको र ती समस्याको हल पार्टीभित्रै छलफल गरेर गर्नुपर्ने आफूले प्रधानमन्त्रीलाई सुझाब दिएको बताएका छन्। ‘समय र परिस्थिति प्रतिकूल जारी अध्यादेशहरु खारेज गरिएपछि पनि अनेकौँ समस्या पार्टीभित्र उत्पन्न भएका छन्। यी समस्या समाधान पार्टी र पार्टी कमिटीलाई बाइपास गरेर गरेर होइन, प्रधानमन्त्रीले प्रत्यक्ष छलफल गरेर र सबै किसिमका विचारहरुको सामना गरेर मात्र गर्न सकिन्छ’, उपाध्यक्ष गौतमले भनेका छन् ।

उनले अगाडि भनेका छन्, ‘तसर्थ, सचिवालय, स्थायी कमिटी र आवश्यक परे केन्द्रीय कमिटीको बैठक बोलाउनुस्। सबभन्दा पहिले सचिवालय बैठक बोलाउन र सबै कमरेडहरुको सुझावलाई सम्मान गर्दै साझा प्रयत्नबाट समस्या समाधान गर्नोस् भनेर मैले प्रधानमन्त्रीलाई सुझाब दिएको हुँ।’

गौतमले भनेका छन्, ‘उहाँले धैर्यतापूर्वक मेरो सल्लाह सुन्नुभयो, थोरै बोल्नुभयो, म बिदा भएर आएँ। भएको यत्ति हो। सबैलाई यही जानकारी लिन विनम्र अनुरोध गर्दछु ।’